He mea nui te whānau, engari he mea tino nui te whānau kōrero Māori. I tēnei wāhanga o te hōtaka, ka noho atu te matua me tana tama ki te pae kōrero tūhura mai ai i ā rāua tuhinga, arā a Ahorangi Taiarahia Black, me tāna tama, a Ahorangi Tuarua a Hona Black.

Ko Ahorangi Taiarahia Black, he mātanga, he rangatira, he kaiwhāngai i ngā kai o te ao Māori, ki te ao whānui. Roto ngā tau paheke noa e whakapau werawera ana ki roto i ngā whare wānanga o Te Kunenga ki Pūrehuroa (Massey University), me Te Whare Wānanga o Awanuiārangi ngā Kuratini o te motu, ngā marae wānanga ō Tūhoe, o ngā iwi o te motu puta noa i Aotearoa. Tau atu hoki ki ngā whare wānanga taketake ā-iwi o te ao whānui. Ko tētahi o ana pukapuka ka tūhurahia e Ahorangi Taiarahia Black mo tēnei hui ko ‘Kōkōhīnau Marae Poukai 2025’. Koia ngā kōrero mo te ara i parangia e ia, i hua mai ai tēnei koha nui ki te motu.

Mō Ahorangi Tuarua Hona Black, he āhua rerekē wāna whakaputanga. Hāngai atu ana ki āna mahi i roto i ngā tini wānaga, kura reo hoki o te motu, kua toru ngā pukapuka a te mātanga nei kua puta i a ia hai whakakōrero, hai akiaki kia kōrerohia tonutia tō tātou reo rangatira. Ko te tuatahi, ko He iti te Kupu, i whakarewangia ai i te tau 2021 hai whakarākei i te reo o te hunga ako.

He whānau tuhituhi, tārai kupu tō whānau? He kura huna pea wā te tokorua nei. Tēnā, ū mai ki tēnei wāhanga, e uiuia ai te tokorua nei e tā tātou kaitaki kōrero o te rā, e Ruth Smith.

“Kei hea aku kōrero hei kura i ahau e haere mai nei ngā rā kei mua i a mātau katoa, ā koutou mokopuna katoa huri te motu?”

He mokopuna kei mua i ō tātau aroaro katoa e korotaha ana te titiro ki a tātau katoa ngā kaituhi. E haere mai ai te rā e pātai ai rātau a tātau mokopuna katoa ki ngā kaituhi o tātau kokona kāinga hinengaro, ngākau, wairua.